GRAAD R ASSESSERING KWARTAAL 3

Graad R Kwartaal 3 Assesseringspakket

Volg en dokumenteer leerders se ontwikkeling met die My Klaskamer Graad R Kwartaal 3 Assesseringspakket, wat spesifiek ontwerp is om saam met die Kwartaal 3-lesplanne te werk.

Namate leerders se taal-, denk-, wiskundige en motoriese vaardighede ontwikkel, bied die pakket ’n gestruktureerde manier om hul vordering tydens bekende klaskameraktiwiteite waar te neem.

Die assesseringstake is volledig geïntegreer met die My Klaskamer Graad R Kwartaal 3-lesplanne. Die opvoeder volg die beplande lesse, gee geleentheid vir inoefening en gebruik die aangeduide assesseringsinstrument wanneer die vaardigheid as hoofbewys waargeneem word.

Hoe werk die geïntegreerde assessering?

Gedurende Week 1–4 word nuwe vaardighede bekendgestel, verken en deur spel en praktiese leergeleenthede vasgelê.

In Week 5–9 word die hoofassesseringsbewyse volgens die daaglikse en weeklikse beplanning ingesamel. Die assessering vind natuurlik plaas deur onder meer mondelinge taalaktiwiteite, klankbewustheid, praktiese Wiskunde, kreatiewe werk en bewegingsaktiwiteite. Week 10 bied ruimte vir ondersteuning, konsolidasie en uitstaande bewyse.

Die pakket bevat 40 assesseringstake wat Huistaal, Wiskunde en Lewensvaardigheid dek. Dit sluit assesseringsplanne, duidelike taakaanwysings, sewevlakrubrieke, kontrolelyste en ’n optekeningsblad in.

Assessering bly ontwikkelingsgepas en sluit aan by die vaardighede wat reeds tydens die kwartaal onderrig is.

Die voordeel? Jy hoef nie self die verband tussen die lesplanne en assesseringstake uit te werk nie. Die beplanning wys wanneer en hoe die bewyse ingesamel en aangeteken moet word.

’n Deurdagte, praktiese assesseringspakket vir Graad R-opvoeders wat doelgerigte onderrig en deurlopende waarneming wil kombineer.